والله العظيم موش عارف اقول ايه بس…. النهاردة قريت ان الريس الى مالوش حل بيقول لبوتين بتاع روسيا ان روسيا عايزاك يا عم الحج بوتين… وان الحج بوتين لازم مايسمعش الكلام بتاع الدستور والناس ولاد الكلب بتوع اليموقراطية علشان هو قائد الشعب الروسى والناس بتحبه زى ما بيحبو بابا مبارك فى الموكوسة مصر

. طبعا بوتين عينة زاغت وشاف فرصة ان ابنة جمالوفيتش ممكن يورث بعدية واهى ميغة يعنى اشمعنة مبارك وابنة.

 ولذلك قرر الحزب الوطنى تصدير الخبرة المصرية فى كيفية دق الشعب حتى يرضى بنصيبة والخبرات الفرعية مثل  تكثيف الجهود لحكم بدون حدود وطبعا مبادئ توريث الحكم من المهد الى اللحد.  وبكرة يعلن جورج اسحق عن التضامن مع حركة كفاية الروسية. والله العظيم حاجة تكسف .. يعنى لما الريس يقول الكلام ده والعالم يقراه هيقولو علينا اية؟ وبعدين هوا مال اهلة بروسيا ولا نظام الانتخابى بتاع روسيا؟  لما حد بيتكلم على سيادته بيقول ده شأن داخلى…انا موش عارف ايه نوع المخدرات الى الواحد ممكن يبلبعها عشان يطلع بتصريح من النوع دة

http://news.filbalad.com//News.asp?NewsID=16039

ولد الدكتور أحمد مستجير عام 1934 في قرية الصلاحيات مركز دكرنس دقهلية وتوفى إثر إنفجار في أحد شرايين المخ وذلك اثناء تواجدة فى النمسا لحضور احدى المؤتمرات العلمية.

المكان: ( الصلاحات ) مركز دكرنس محافظة الدقهلية. الزمان: أول ديسمبر سنة 1934م. ولد أحمد مستجير مصطفى الذي حصل على بكالوريوس الزراعة من جامعة القاهرة 1954 ، ثم ماجستير عام 1958م ثم دبلوم وراثة الحيوان من معهد الوراثة بجامعة أدنبره عام1961م ثم الدكتوراه عام 1963م من ذات المعهد وبذات الجامعة، عاد بعدها ليعمل مدرسا بكلية الزراعة جامعة القاهرة عام 1964م ثم رقي إلى أستاذ مساعدعام 1971م فأستاذ عام 1974م ثم انتخب عميداً للكلية من سنة 1986م وحتى 1995م ومنذ ذلك التاريخ وحتى الآن أستاذاً متفرغاً بكليته . حصل على العديد من الجوائز منها: جائزة الدولة التشجيعية للعلوم والزراعة 1974م، ووسام العلوم والفنون من الطبقة الأولى 1974م وعام 1996م ، وجائزة أفضل كتاب علمي مترجم 1993م وجائزة الإبداع العلمي 1995م وجائزة الدولة التقديرية لعلوم الزراعة عام 1996م ، و جائزة أفضل كتاب لعام 1999م و جائزة أفضل عمل ثقافي لعام 2000م ، حصل علي جائزة مبارك في العلوم لعام 2002م . عضو في اثنتي عشرة هيئة وجمعية علمية وثقافية منها: الجمعية المصرية لعلوم الإنتاج الحيواني، والجمعية المصرية للعلوم الوراثية، واتحاد الكتاب، واختير عضوا بمجمع اللغة العربية بالقاهرة سنة 1994م ويشارك أسبوعيا في لجان المجمع ومجلسه ، وسنوياً في مؤتمره . من إنتاجه العلمي: لـه: أكثر من أربعين بحثا منشوراً في كبرى المجلات العلمية المتخصصة الأجنبية و المحلية. ولـه: مؤلفات في التحسين الوراثي للحيوان منها ( مقدمة في علم تربية الحيوان) 1969م ، و(النواحي التطبيقية في تحسين الحيوان والدواجن) 1986م . ولـه: كتب مترجمة في العلوم والفلسفة أولها ( قصة الكم المثيرة ) 1969م وأحدثها ( الجينات و الشعوب و اللغات ) 2000م . ولـه : كتب مؤلفة عن الأدب والثقافة العلمية أقدمها بعنوان( في بحور الشعر) 1980م وأحدثها( القرصنة الوراثية – ) 2000م و له سلسلة كتب بعنوان (في بحور العلم) تصدر داخل سلسلة اقرأ لدار المعارف احدث ما صدر منها (علم اسمه السعادة ) 2002م وبين الأقدم الكتب وأحدثها سـبعة كتب أغرب عنوان بـها صدر عام 1987م وهو (مدخل رياضي إلى عروض الشعر العربي) ولـه ترجمة لكتب أدبية: ( ثلاثة رجال في قارب ) 1988م، و(أفكار تافهة لرجل كسول) عام 1992م.

ذكرت صحيفة “المصري اليوم” فى عددها الصادر يوم الخميس أن اللجنة المختصة بتخطيط وتطوير ميدان رمسيس قررت إطلاق اسم “مبارك” على الميدان بدلا من اسمه الحالي ، وذلك بعد نقل التمثال منه بشكل نهائي.

ثمثال رمسيس في مقرة الحالى بميدان رمسيس قبل نقله

وأوضحت الصحيفة نقلا عن مصادر داخل اللجنة ، التي تضم وزارات النقل والثقافة والإسكان إضافة إلى محافظة القاهرة ، أن القرار جاء بسبب وجود محطة مترو مبارك وأسوة بإطلاق اسم السادات على ميدان التحرير لوجود محطة السادات به.

وتجدر الإشارة إلى أنه يتم الآن الإعداد لنقل تمثال رمسيس في الخامس عشر من أغسطس القادم من مقره بـ “ميدان رمسيس” الشهير إلى مقره النهائي أمام المتحف الجديد علي طريق الفيوم في منطقة الأهرامات.

ومن المقرر أن يتم نقل التمثال ليلا حفاظا على السيولة المرورية ، كما ستبلغ تكاليف نقل التمثال ستة ملايين جنيه تتحملها وزارة الثقافة

تعليقى: ميدان سادات ايه ومبارك ايه؟ اسمه طول عمره ميدان رمسيس والتحرير….ايه القرف والنفاق ده … الناس ديه موش فاهمة حاجة وعرر بكره ميدان العتبه يغيرو اسمه و يسموه جمال مبارك

في واحد راح يستقبل ابن عمه في المطار
 المهم وهم راجعين من المطار
 
 بيسأله: انت بقا لك عشر سنين في أمريكا.. كنت بتدرس ايه؟
رد عليه ابن عمه : كنت بدرس علم المنطق
 
قاله : ايه هو علم المنطق؟
 
رد عليه: صعب اللي درسته فى عشر سنوات اشرحهولك فى ساعه بس انا هاديك
مثال على المنطق
 
قاله : اوكي
 
سأله ابو المنطق : انتوا عندكم كلب
في البيت, صح؟
 
رد عليه: ايوةعندنا
 
قاله: ادام عندكم كلب اكيد انكم عاملين له بيت فى الحوش

رد عليه: صح عاملين له بيت في الحوش
 
قاله : مادام انه عندكم حوش اكيد انكم عايشين في فيلا
 
رد عليه: صح إحنا عايشين في فيلا
 
قاله: مدام انكم عايشين في فلا اكيد ان ابوك غني
 
رد عليه: صح ابويا غني
 
قاله: مدام انه ابوك غني اكيد ان امك تقعد في البيت يعنى مش محتاجه
انها تشتغل رقاصة عشان تجيب فلوس
 
رد عليه: صحيح امي قاعدة في البيت
 
قاله : هذا هو المنطق , انك تبني شيء علي شيء.
 
من وجود الكلب في بيتكم استنتجنا ان امك مش رقاصة
 
ردعليه : ياااااااااااا هو ده المنطق؟
 
المهم … صاحبنا راح عند صحابه باليل وحب يتفزلك عليهم
 
وسألهم ياشباب تعرفون ايه هو المنطق ؟
 
رد واحد لا والله ما نعرفش
 
قال : انا اعلمكم
 
سأل صاحبه: انتوا عندكم كلب في البيت ؟
 
رد عليه صاحبه : لا ما عندناش
 
قاله : تبقى امك رقاصة
 

النضال كفعل أناني

لما الواحد بيختار أنه ينخرط في عمل سياسي معارض للي في ايديهم القوة و يمشي على طريق النضال ضد سلطة غاشمة لازم يكون مستعد يدفع الثمن، لكن مش هو لوحده اللي بيدفع الثمن، لما تتحبس أو تتعذب أو تنقتل أهلك بيتبهدلوا معاك، و أهلك مش بالضرورة اختاروا اختيارك و لا بالضرورة موافقين عليه، و ساعات كمان بتلاقي ناس أهلها مبتكتشفش خيار النضال و تبعاته غير بعد المصيبة ما تحل.

تخيل كده أم بتسمع فجأة أن بنتها في الحبس رغم أن تصورها عن بنتها أنها ماشية جنب الحيط.

بلاش الأم، اختيارك ده ممكن نتيجته تبقى على أولادك، لو اتحبست هيعيشوا من غير أب أو أم، و ممكن الأسوأ، مثلا حكومتنا الرشيدة اعتادت أنها تعذب و تعتقل الأهل لما تبقى مش قادرة توصل للشخص المطلوب. و مثلا في العريش عذبوا الأطفال و العجائز و النساء زيادة كده لحسن يكون تعذيب الشباب مجابش نتيجة.

مش بس الأهل اللي في خطر، في المعتاد المستبد بيلوش يمين و شمال، بيستخدم وسائل قمع جماعية أوسع بكتير من الأهل و ميفرقش معاه العواقب ولا النتائج، مثلا في مظاهرات التضامن مع القضاة انقلبت عربية أمن مركزي و مات فيها عشرات الجنود، عربيات و واجهات محلات اتكسرت بسبب عنف الأمن، فيه ناس ملهاش دعوة بأي حاجة انضربوا و فيه ناس ملهاش دعوة بأي حاجة اتحبست زي ابراهيم اللي كان محبوس معانا و كان كل يوم بيبكي من القهر.

كل دي ناس دفعت ثمن أفعالنا أحنا و اختياراتنا أحنا، غالبا لو عدينا اللي دفعوا ثمن و عدينا اللي اختاروا النضال يطلع اللي دفعوا ثمن النضال عددهم أكبر بكتير من اللي خدوا قرار النضال و جهزوا نفسهم لدفع الثمن.

مش ده ممكن يتفسر على أنه فعل أناني؟ مش أنت كده بتفرض على ناس أنهم يدفعوا ثمن اختياراتك أنت؟ بتفرض على أهلك نمط حياة و مخاطر و بهدلة هما ملهمش دخل بيها؟!

ناس كتير بتدعي أنها ممكن تشارك في العمل السياسي لولا بس خوفها على أهلها و أحبابها. ناس كتير بتنتقد المظاهرات و ما شابه بسبب الخسائر اللي بيسببها للآخرين. اللي خد خطوة مش بيخاطر بنفسه و بس، مع ذلك أغلبية اللي اختار النضال مش شايف أنها أنانية و لا ضميره بيعذبه، مش أنا اللي اخترت بهدلة أهلي، الظالم اللي أنا بحاربه هو اللي اختار و هو المسئول.

القوة كمعيار أخلاقي

رغم أني مش مقتنع بأنانية المناضل لكن ممكن أتفهم اللي يشوف الدنيا كده، الغريبة اللي شايف أن قوتك كمناضل تفرق في خيارك ده أناني ولا لأ!

تلاقي ناس بتعاتبك لأنك بتبهدل أهلك رغم أنك مش هتقدر تحقق حاجة، ناس بتعاتبك عشان الأمن عطل الشارع عشان انت نزلت الشارع و يقولولك بغيظ أنت كلكم كام واحد يعني عشان تعملوا مظاهرة، و الكلام ده مش بيتقال عشان أحنا ضعاف قوي، بيتقال كمان للأخوان يعني المسألة مش قد ايه أنت ضعيف المسألة قد ايه اللي قدامك قوي.

طب ده كلام عجيب جدا، لو أنت بتقيمني بمعيار أخلاقي، يفرق في ايه بقى أنا قوى ولا ضعيف؟ لو أنت بتقول كلام عملي من نوع لما تبقى ضعيف المفروض تعمل كذا بدل كذا، على عيني و راسي، لكن تقوللي لما تبقى ضعيف متناضلش خالص؟

طب هبقى قوي امتى اذا مبدأتش؟ و اذا ما ناضلتش أعمل ايه؟

بلاش دي، هعرف منين قوتي، مش القوة دي حاجة نسبية؟ مش لازم أجرب عشان أعرف بالمقارنة بعدوي أنا قوي قد ايه؟ و لا أغير حاجة في أسلوبي أو يجيلي ناس جديدة مش لازم برضه أجرب عشان أعرف أكتسبت قوة جديدة ولا لأ؟ ولا هو ينفع نحسب الكلام ده بالمحاكاة على الورق؟

التأبين كحدث لاهوتي

تصور أن في اتفاق ما بين أغلبية الدينيين باختلاف أديانهم و اللا دينيين كمان باختلاف أيديولوجياتهم على صورة للحياة الأخرى؟ أه أغلبية البشر (على الأقل اللي أعرفهم و أسمع عنهم) يفرق معاهم الناس هتفتكرك بأيه بعد ما تموت.

مظنش محتاج تبقى مسلم سني عشان تقتنع أنك ان مت مش هتسيب وراك غير صدقة جارية ، أو علم ينتفع به ، أو ولد صالح يدعو لك، عممها شوية كده و خد لحظة التأبين أو ليلة الأربعين كمعيار.

في تأبين أحمد عبد الله مسمعتش حد بيعدد الناس اللي اتبهدلت بسبب أختياراته، مسمعتش حد بيحاسبه على أنانية لفت انتباه الظالم و جلاده، مظنش حد من اللي اتحبسوا معايا الناس هتفتكره بأنه اللي حبس ابراهيم عبد العزيز، مظنش حد من اللي اتمسكوا في المظاهرات الناس هتفتكروا بأنه اللي عطل فلان عن شغله، أو اللي تسبب في أن الأمن المركزي يتحرك بذعر و يتقلبله عربية يموت فيها عشرات، و لا بأنه اللي سخن كلاب الداخلية فكسروا عربية علان، لو الناس افتكرتنا أكيد هتفتكرنا عشان نضالنا.

و الغريبة يا أخي أن في وضع التأبين، موضوع القوة و غيابها يتقلب 180 درجة، تلاقي الناس تفتكرك بالخير عشان وقفت في وش المدفع رغم أنك كنت ضعيف.

الانتصار كعامل تطهيري

و حتى لو الناس كان ممكن تفتكرلك ضعفك، تهورك، أو أنانيتك في النضال مش هيحصل لو أنت منتصر. اذا كان التأبين انعكاس للحياة الأخرى للمناضل، يبقى الانتصار هو توبته عن كل خطيئة.

بالنسبة لي مينفعش القوي يبقاله معايير أخلاقية غير الضعيف، مينفعش المنتصر يتحاسب حساب غير المهزوم.

لو أخترت تحارب الظلم مش ذنبك أن الظالم هيخبط في اللي حواليك، لو اخترت تحارب الظلم مش ذنبك أن اللي واقفين معاك قليلين لأنك لو استنيتهم يكتروا يبقى الظلم هينتصر و بطشه هيزيد، ده جزء من المعركة و لازم تفوت فيه. و لو اخترت تحارب الظلم سيبك من اللي قاعد في التكييف مستني يشوف هتنتصر ولا لأ عشان بعد كده يقول أنت كنت صح ولا لأ، لازم ألاف ينهزموا هزايم كبيرة و ينتصروا انتصارات صغيرة عشان نقدر نقف على كتافهم و ننتصر نصر كبير.

جاءَ طوفان نوحْ.
ها همُ الجُبناءُ يفرّون نحو السَّفينهْ.
بينما كُنتُ..
كانَ شبابُ المدينةْ
يلجمونَ جوادَ المياه الجَمُوحْ
ينقلونَ المِياهَ على الكَتفين.
ويستبقونَ الزمنْ
يبتنونَ سُدود الحجارةِ
عَلَّهم يُنقذونَ مِهادَ الصِّبا والحضاره
علَّهم يُنقذونَ.. الوطنْ!
.. صاحَ بي سيدُ الفُلكِ – قبل حُلولِ
السَّكينهْ:
“انجِ من بلدٍ.. لمْ تعدْ فيهِ روحْ!”
قلتُ:
طوبى لمن طعِموا خُبزه..
في الزمانِ الحسنْ
وأداروا له الظَّهرَ
يوم المِحَن!
ولنا المجدُ – نحنُ الذينَ وقَفْنا
(وقد طَمسَ اللهُ أسماءنا!)
نتحدى الدَّمارَ..
ونأوي الى جبلٍِ لا يموت
(يسمونَه الشَّعب!)
نأبي الفرارَ..
ونأبي النُزوحْ!

أمل دنقل – مقابلة خاصة مع ابن نوح

منقول من مدونة علاء ومنال

عن موقع كفاية
استغل نظام مبارك انشغال الرأي العام المصري بالعدوان الصهيوني على الشعب اللبناني، لمباغتة شعب مصر بعدوان جديد على رزقه ولقمة عيشه الصعبة، برفع أسعار البنزين والسولار (من جنية إلى 130 قرشاً، ومن 60 إلى 75 قرشاً)، بعد أن كان قد أتم رفع سعر تذكرة المترو (من 75 قرشا إلى مائة قرشاً) في الأسبوع الماضي!، ورفع رسوم المرور على الطرق السريعة بنسبة 100% وهو ما يعني – تلقائياً – زيادة أسعار كافة الخدمات كالنقل والسكك الحديدية والمواد الغذائية وغيرها، كما بثته مصادر موثوقة، النية الحكومية المبيتة لرفع أسعار الغاز الطبيعي والكهرباء ومياه الشرب، وعدد آخر من متطلبات الحياة الأساسية في الفترة القريبة القادمة، في خطوة مباغتة، تتناقض وكل الوعود المباركية، في المعركة الرئاسية الماضية، التي مارست تضليلاً واسع النطاق تجاه المواطنين، زعمت من خلاله أن سنوات حكم مبارك الأخيرة ستشهد تحسناً ملحوظاً في مستوى معيشتهم، وحلولاً جذرية للمشاكل المتراكمة على امتداد العقود السابقة!. وتعكس هذه الممارسات، بشكل واضح، طبيعة انحيازات السلطة التي تضيق قاعدتها الاجتماعية يوماً بعد يوم، وتتراكم – بسبب سياساتها – الثروة بصورة صارخةٍ، في جانب قسم ضئيل للغاية من جماعات المصالح والملتفين حول النظام، الذين ينهبون المليارات، ويكدسون مئات الملايين من عمليات النهب المنظم للثروة الوطنية، فيما يستبد الفقر والبطالة والجوع والمرض، وانعدام الفرص وضياع الأمل، بالأغلبية العظمى من أبناء الشعب، الذين فقدوا كل رجاء في المستقبل، وتبددت كل آمالهم، على يد تحالف الفساد والاستبداد، الذي يحكم بالحديد والنار البلاد، ويتحكم في مصائر الوطن والشعب

القاهرة (مصر) – رويترز : أكد الرئيس المصري حسني مبارك في مقابلة نشرت يوم الأربعاء أنه لا حاجة لتعيين نائب لرئيس الدولة، مرجحا ترك المنصب الذي صعد منه للرئاسة وكذلك سلفه الرئيس الراحل أنور السادات شاغرا

وقال مبارك في المقابلة التي نشرتها صحيفة الأهرام المسائي إن المنصب الذي شغله في عهد السادات ليس لازما شغله ، وأضاف : “تجربتنا منذ قيام النظام الجمهوري لا تدعو للتمسك به”.وتابع : “إذا قال أحد بأنني كنت نائبا للرئيس السادات فأن ذلك جرى قبل أن نتحرك على طريق الديمقراطية ، بصراحة إنني أخشى من أن يؤدي هذا المنصب إلى صراعات ووشايات تعطل مسيرة العمل الوطني”.وضمن مبارك فترة رئاسته الحالية وهي الخامسة ومدتها ست سنوات بفوزه في أول انتخابات رئاسة تنافسية في البلاد أجريت العام الماضي.وقالت الحكومة إن انتخابات الرئاسة التنافسية هي محور عملية إصلاح ديمقراطي ، لكن المعارضة تقول انها كانت استفتاء مقنعا بسبب شروط صارمة لمن يحق له التنافس على المنصب.وليس لدى أي حزب أو جماعة سياسية في الوقت الحالي العدد اللازم من مقاعد البرلمان والمجالس المحلية للتزكية للترشيح ، وهو ما يجعل الترشيح للمنصب حكرا على الحزب الحاكم.ويقول محللون إن جمال هو الاختيار الواضح للحزب في حالة الترشيح للمنصب ، فهو أحد أبرز الشخصيات المؤثرة في الحزب وزاد بروزه في الساحة السياسية هذا العام.